ករណីប្លន់សម្លាប់នៅខណ្ឌច្បារអំពៅ កម្លាំង​ការិយាល័យ​ព្រហ្មទណ្ឌ​កម្រិតធ្ងន់ក្រសួងមហាផ្ទៃ​បំបែកសំណុំរឿងបានហើយ!

ភ្នំពេញ៖ ក្រោយបើកការស្រាវជ្រាវយ៉ាងយកចិត្ដទុកដាក់រួចមក ទីបំផុត ជនសង្ស័យដៃដល់​ និងអ្នករួមគំនិត​អាកសម្លាប់បុរសម្នាក់ នៅខណ្ឌច្បារអំពៅ រាជធានីភ្នំពេញ កាលពីថ្ងៃទី១១​ ខែមីនា ឆ្នាំ២០២១ ត្រូវកម្លាំងនគរបាលតាមបង្ក្រាបបានហើយ នៅស្រុកគីរីវង់​ ខេត្តតាកែវ​ ទីដែលជនដៃដល់កំពុងរត់គេចខ្លួន នារសៀលថ្ងៃទី១៦​ ខែមីនា​ ឆ្នាំ២០២១នេះ។

ប្រតិបត្តិការនោះ ធ្វើឡើងក្រោមការបញ្ជាផ្ទាល់ពី នាយឧត្តមសេនីយ៍ នេត សាវឿន អគ្គស្នងការនគរបាលជាតិ, ឧត្តមសេនីយ៍ឯក អ៉ិន បូរ៉ា អគ្គស្នងការរងនគរបាលជាតិ និងមានការចង្អុលបង្ហាញពីឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ ដែលមានការសម្របសម្រួលនីតិវិធី​ ដោយព្រះរាជអាជ្ញានៃអយ្យការអមសាលាដំបូងរាជធានីភ្នំពេញ, កម្លាំងនាយកដ្ឋាននគរបាលព្រហ្មទណ្ឌ ក្រសួងមហាផ្ទៃ​ សហការជាមួយការិយាល័យនគរបាលព្រហ្មទណ្ឌកម្រិតធ្ងន់​ នៃស្នងការដ្ឋាននគរបាលរាជធានីភ្នំពេញ,​ អធិការដ្ឋាននគរបាលខណ្ឌច្បារអំពៅ និងកម្លាំងស្នងការដ្ឋាននគរបាលខេត្តតាកែវ​។

នគរបាលជំនាញ បានឱ្យដឹងថា​ ជនសង្ស័យដែលសមត្ថកិច្ចចាប់ខ្លួនបាននោះ​ ឈ្មោះ ម៉ៅ​ រដ្ឋា​ ហៅជិប​ ភេទប្រុស ចាប់ខ្លួនបាននៅតាមបណ្តោយផ្លូវជាតិលេខ១​ នៅមុខមណ្ឌលសុខភាព​ ព្រែកឯង​ សង្កាត់ព្រែកឯង ខណ្ឌច្បារអំពៅ​ និងឈ្មោះ​ ម៉េង​ ណាឃីម​ ភេទប្រុស​ អាយុ​ ២១ឆ្នាំ​ ចាប់ខ្លួនបាននៅស្រុងគិរីវង់​ ខេត្តតាកែវ។

ក្រុមជនសង្ស័យ បានសារភាពថា កាលពីថ្ងៃទី១១ ខែមីនា ឆ្នាំ២០២១ នៅថ្ងៃកើតហេតុពួកគេបានរៀបគម្រោង និងបបួលជនរងគ្រោះទៅហូបអីជុំគ្នានៅកោះពេជ្រ ដោយស្ថានភាពមិនប្រក្រតី ក៏បាននាំគ្នាទៅផ្ទះវិញរៀងខ្លួន មិនបានប៉ុន្មានក្រុមជនសង្ស័យបានហៅជនរងគ្រោះទៅក្រៅម្ដងទៀត ទៅម្ដុំផ្លូវជាតិលេខ១ លុះដល់ចំណុចងងឹត ក៏បានធ្វើសកម្មភាពតែម្ដង។ ក្រោយពីធ្វេីសកម្មភាពរួច​ ជនសង្ស័យទាំង​ ២នាក់​ បានចែកសម្ភារគ្នា ដោយឈ្មោះ ម៉ៅ រដ្ឋា ហៅ ជិប យកជិញ្ជៀនមាស និងខ្សែករ​ ចំណែកឈ្មោះ ម៉េង ណាឃីម យកម៉ូតូ ទូរស័ព្ទដៃ និងខ្សែដៃ រួចនាំគ្នាគេចខ្លួនទៅស្រុកគិរីវង់ ខេត្តតាកែវ។

បច្ចុប្បន្នជនសង្ស័យទាំងពីរនាក់ ត្រូវកម្លាំងជំនាញ នៃនាយកដ្ឋាននគរបាលព្រហ្មទណ្ឌ កំពុងសាកសួរ​ និងរៀបចំឯកសារប្រគល់ជនសង្ស័យ​ និងវត្ថុតាងឱ្យទៅអធិការដ្ឋាននគរបាលខណ្ឌច្បារអំពៅ​ ដើម្បីចាត់ការទៅតាមនីតិវិធី និងត្រៀមបញ្ជូនជនសង្ស័យទៅតុលាការ៕

ដោយ៖ ឌីយ៉ាម៉ង


ប្រភពពី CNC

Leave a Reply

Your email address will not be published. Required fields are marked *