អបអរសាទរ កូនខ្មែរម្នាក់ទៀតហើយ!!! ឈ្នះ​ជយលាភី​លេខ១ គ្រង​មកុដ​បុរសឯក​អន្តរជាតិ…

(ភ្នំពេញ)៖ បេក្ខភាពតំណាងឲ្យប្រទេសកម្ពុជា ក្នុងការចេញទៅប្រកួតកម្មវិធី «បុរសឯកអន្តរជាតិ» ឬ «Mister United Continent» លោក ពឹង ច័ន្ទបរមី បានទទួលជយលាភីលេខ១ ក្លាយជាម្ចាស់គ្រងមកុដក្នុងពីកម្មវិធី ដែលមានប្រទេសហ្វីលីពីន ធ្វើជាម្ចាស់ផ្ទះ ខណៈមាន២៥ប្រទេសមកពីជុំវិញពិភពលោក ចូលរួមប្រកួត។

ការទទួលបានមកុដបុរសឯកអន្តរជាតិ ជាលើកដំបូងសម្រាប់ប្រទេសកម្ពុជា ត្រូវបានលោក ពឹង ច័ន្ទបរមី ថ្លែងប្រាប់ឲ្យដឹងថា កាលពីអំឡុង ខែវិច្ឆិកា ឆ្នាំ២០១៨ កន្លងទៅ លោក​ធ្លាប់បានក្លាយជាតំណាងកម្ពុជា ចូលរួមប្រកួត ក្នុងកម្មវិធី​ «Mister United Continent» នៅក្នុងប្រទេសហ្វីលីពីន ដោយទទួលបានត្រឹមជយលាភីលេខ៣ ខណៈដែលជយលាភីលេខ១ គឺបានទៅលើប្រទេសហ្ស៊ូដង់ និងលេខ២ គឺបានទៅលើប្រទេសថៃ។

ប៉ុន្តែដោយសារស្របពេលដែលចំណាត់ថ្នាក់លេខ១ មកពីប្រទេសហ្ស៊ូដង់ បានធ្វើខុសលក្ខខណ្ឌកម្មវិធី ទើបតម្រូវឲ្យគណៈកម្មការ «Mister United Continent» ធ្វើការដកតំណែងជាម្ចាស់មកុដ ទៅឲ្យបុរសឯក ដែលជាជយលាភីលេខ២ និងលេខ៣ ដែលមានកម្ពុជា និងថៃ តាមរយៈការបោះឆ្នោតជាសាធារណៈ​ ទូទាំងប្រទេសហ្វីលីពីន។

តា​មរយៈសមត្ថភាព ភាពលេចធ្លោ បូករួមទាំងប្រជាប្រិយភាព បានធ្វើឲ្យលោក ពឹង ច័ន្ទបរមី ទទួលបានសារគាំទ្រពីការបោះឆ្នោត ជាសាធារណៈក្នុងប្រទេសហ្វីលីពីន ច្រើនជាងបុរសឯកមកពីប្រទេសថៃ ទើបធ្វើឲ្យលោកមានឱកាសក្ដោបបានតំណែង ជយលាភីលេខ១ គ្រងមកុដបុរសឯកអន្តរជាតិនៅឆ្នាំនេះ។

ជាមួយនឹងជយលាភី លោក ពឹង ច័ន្ទបរមី បានបង្ហាញពីអារម្មណ៍រំភើប សប្បាយរីករាយ និងមានមោទនភាពជាខ្លាំង នៅពេលដែលលោកបាន​ធ្វើឲ្យប្រទេសកម្ពុជា មានមុខមាត់ និងមោទនភាពនៅលើឆាកអន្តរជាតិ ព្រមទាំងទទួលបានជយលាភីលេខ១ មកជូនជាតិមាតុភូមិវិញ៕

ប្រភព៖ freshnews.asia

Leave a Reply

Your email address will not be published.