កូនខ្មែរគ្រប់រូបគប្បីដឹងថា ពុម្ពអក្សរខ្មែរយូនីកូដសព្វថ្ងៃ គឺលោក ដាញ់ ហុង ជាស្ថាបនិកដំបូងគេនៅខ្មែរ
កូនខ្មែរយើងនេះបានធ្វើការងារល្អច្រើនសម្រាប់សង្គមជាតិមួយនេះ។ ដូចជាសព្វថ្ងៃនេះប្រព័ន្ធអក្សរខ្មែរយូនីកូដមកប្រើសម្រាប់វាយអត្ថបទនៅលើកុំព្យូទ័រ និងអ៊ីនធឺណិតឲ្យកាន់តែងាយស្រួលជាង ប្រព័ន្ធលីមូន(Limon) ត្រូវបានកូនខ្មែរយើងបង្កើតបាន។
ចំពោះស្នាដៃនេះ ជាការរួមចំណែកយ៉ាងសំខាន់ក្នុងការលើកស្ទួយអក្សរសាស្ត្រខ្មែរខ្ពស់មុខខ្ពស់មាត់ និងទទួលបានការគាំទ្រយ៉ាងខ្លាំងក្លាពីពលរដ្ឋកម្ពុជា។លោក ដាញ់ ហុង ជាស្ថាបនិកដំបូងគេនៅខ្មែរដែលបានលើកស្ទួយអក្សរសាស្ត្រខ្មែរ។
លោកដាញ់ ហុងបានចំណាយពេលសិក្សាស្រាវជ្រាវជាច្រើនឆ្នាំ ដើម្បីធ្វើគម្រោងអភិវឌ្ឍអក្សរខ្មែរយូនីកូដឲ្យលេចជារូបរាង។ ក្នុងអំឡុងឆ្នាំ ២០០២ លោកបានសម្រេចបង្កើតបានពុម្ភអក្សរខ្មែរយូនីកូដ ដែលបានជួយដោះស្រាយបញ្ហាស្មុគស្មាញជាច្រើន។បើគ្មានការប្រឹងប្រែងនិងការបង្កើតបានស្នាដៃដ៏អស្ចារ្យរបស់បុរសខ្មែរកម្ពុជាក្រោមនេះទេ ការប្រើប្រាស់អក្សរខ្មែរនៅតែមានការលំបាក។
ទោះបីអក្សរយូនីកូដបច្ចុប្បន្នកំពុងត្រូវបានប្រើប្រាស់ទូលំទូលាយ និងវាបានក្លាយជាអក្សរស្តង់ដាសម្រាប់ប្រើប្រាស់តាមស្ថាប័ននានា លោកដាញ់ ហុងបានអះអាងថា លោកនៅតែបន្តអភិវឌ្ឍអក្សរខ្មែរនេះ និងចង់ឲ្យពលរដ្ឋបន្តការគាំទ្រនិងរួមគ្នាជួយអភិវឌ្ឍអក្សរសាស្រ្តជាតិនេះ ដើម្បីឲ្យមានការប្រើប្រាស់និងទទួលស្គាល់ជាសាកល៕