ហួសថ្លែង! បង្ខំកូនស្រី​ឲ្យចាកចេញពីមិត្តប្រុសពិការ តែនាងមិនព្រម ប៉ុន្តែចុងក្រោយភ្លឺភ្នែកគ្រប់គ្នា

រឿងរ៉ាវស្នេហារវាងនារីម្នាក់ឈ្មោះ យ៉ាងណាន ត្រូវបាន​​ឪពុក​ម្ដាយ​ប្រាប់​ថា ​ពួក​គាត់​នឹង​អនុញ្ញាត​ឲ្យ​នាង​រួម​រស់​ជាមួយ ហុងបូ ​​បន្ត​ទៀត ​បើសិន​​​មិត្តប្រុសរូប​នេះ​អាច​ដើរ​បាន​ក្នុង​រយៈ​ពេល ៣ឆ្នាំ​​បន្ទាប់​ ​បើ​មិន​ដូច្នោះ​ទេ ​ពួក​គាត់​នឹង​កាត់​កាល់ ហើយ​បណ្ដេញ​នាង និង​មិត្ត​ប្រុស​នាង​ចេញ​ពី​ផ្ទះ។នាង​ យ៉ាងណាន ​មាន​អាយុ ២៣​ឆ្នាំ ឯ​លោក ​ហុងបូ អាយុ ២៧ឆ្នាំ។ ហុងបូ ​បាន​ធ្លាក់​ខ្លួន​ពិការ​ដោយ​សារ​ជួប​​ឧបទ្ទវហេតុ​ពេល​ជិះ​ម៉ូតូ​ ​ជា​លទ្ធផល​គាត់​ត្រូវ​ពិការ​ត្រឹម​ចង្កេះ​ចុះ​ក្រោម។

​បន្ទាប់​ពី​រយៈ​ពេល​កំណត់ ៣ឆ្នាំ​កន្លង​ផុត​ ហុងបូ ​​នៅ​តែ​មិន​បាន​ធូរស្បើយ​។ ​កូន​ស្រី​ដដែល​បាន​​​អង្វរ​ឪពុក​ម្ដាយ​សុំ​ពេល​បន្ថែម​ រហូត​​ពន្យារពេល​ឲ្យ ហុងបូ ​រយៈ​ពេល ៦​​ខែទៀត ​ធ្វើ​យ៉ាង​ណា​​ត្រូវ​ដើរ​ឲ្យ​រួច ដើម្បី​ជួយ​ធ្វើ​កិច្ច​ការងារ​គ្រួសារ។

យ៉ាងណាន ​បាន​ប្រាប់​អ្នក​យក​ព័ត៌មាន​ថា «​ខ្ញុំ​មិន​ដឹង​​ថា ត្រូវ​ធ្វើ​យ៉ាងម៉េច​ទេ។ ខ្ញុំ​គ្រាន់​តែ​ដឹង​ថា ​គាត់​អាច​ព្យាបាល​ជា ​ប៉ុន្តែ​ពួក​យើង​មិន​មាន​ប្រាក់​​ចេញ​ថ្លៃ​វះកាត់​។ ​យើង​សឹង​តែ​មិន​មាន​ប្រាក់​គ្រប់គ្រាន់​សម្រាប់​ចាយ​វាយ​ប្រចាំ​ថ្ងៃ​ផង»។ ​ឯ​ ហុងបូ ​បាន​យល់​ព្រម​ជា​មួយ​អនាគត​ឪពុកម្ដាយ​ក្មេក​ថា ​មិត្ត​ស្រី​ខ្លួន​គួរ​តែ​ចាក​ចេញ​ពី​គាត់ ​និង​រស់​នៅ​ដោយ​ភាព​រីករាយ​ជាមួយ​បុរស​ផ្សេង​ ​បើ​គាត់​មិន​អាច​ជា​សះស្បើយ​ក្នុង​អំឡុង​ពេល​ដែល​ផ្ដល់​ឲ្យ​នោះ​។ «​នាង​មិន​អាច​មាន​អនាគត​ល្អ បើ​នាង​នៅ​រួម​រស់​ជា​មួយ​ខ្ញុំ ហើយ​ខ្ញុំ​ក៏​សន្យា​គោរព​​តាម​លក្ខខណ្ឌ​ដាក់​ឲ្យ​នោះ ប្រសិន​បើ​មិន​អាច​ព្យាបាល​ជើង​ជា​សះស្បើយ​នៅ ៦​ខែ​ទៀត»។ ​ហុងបូ បញ្ជាក់។

គូស្នេហ៍​ទាំង​ពីរ បច្ចុប្បន្ន​កំពុង​រស់​នៅ​ទីក្រុង Qionglai ខេត្ត​ស៊ីឈួន ​ភាគ​និរតី ប្រទេស​ចិន។ ដំបូង​ពួក​គេ​គ្រាន់​តែ​ជា​មិត្ត​ល្អ​នឹង​គ្នា​ប៉ុណ្ណោះ និង​មិន​មាន​ភាព​ស្និទ្ធស្នាល​បែប​គូសង្សារ​ទេ មុន​ពេល​ ហុងបូ ជួប​គ្រោះ​ថ្នាក់​។ កាល​នោះ ​ហុងបូ បាន​កំពុង​ជិះ​ម៉ូតូ​តាម​ផ្លូវ​ចង្កេះ​ភ្នំ ស្រាប់​តែ​មេឃ​​ធ្លាក់​ភ្លៀង​ខ្លាំង ​ទឹក​​​​ហូរ​យ៉ាង​គំហុក​ចុះ​ពី​ភ្នំ​កាត់​តាម​ផ្លូវ រហូត​រុញច្រាន​ម៉ូតូ​របស់​គាត់​ប៉ើង​ចេញ​ពីផ្លូវ ធ្លាក់​ចំណោត​ភ្នំ​ជម្រៅ​ប្រមាណ ៣០​ម៉ែត្រ​ទាំង​កម្រោល។ ​ជា​សំណាង​ល្អ ​គាត់​មិន​បាត់​បង់​ជីវិត តែ​រង​របួស​ធ្ងន់។

បន្ទាប់​ពី​គាត់​ចាក​ចេញ​ពី​មន្ទីរពេទ្យ ហុងបូ ​ត្រូវ​ត្រលប់​ទៅ​សម្រាក​នៅ​ផ្ទះ​កំណើត​វិញ។ ចំណែក ឪពុកម្ដាយ​បង្កើត​របស់​​គាត់​ តែង​តែ​កើត​រឿង​រកាំរកូស​បង្ក​ជា​ជម្លោះ​ក្ដៅ​គគុក​​ដោយ​សារ​តែ​ស្ថានភាព​អាការៈ​របស់ ហុងបូ។ ​ថ្ងៃ​មួយ ​ជម្លោះ​ទាស់ទែង​តឹង​សរសៃ​ក រហូត​បញ្ឆេះ​កំហឹង​​​ឪពុក​របស់​គាត់ ​ជ្រុល​ដៃ ​វាយ​ម្ដាយ​រហូត​ដល់​បាត់​បង់​ជីវិត។ ​ឪពុក​ជា​ជន​ល្មើស​បាន​សារភាព​ថា ​វា​ជា​ឧបទ្ទវហេតុ និង​អចេតនា ប៉ុន្តែ​គាត់​ត្រូវ​កាត់​ទោស​ឲ្យ​ជាប់​ពន្ធនាគារ​រយៈពេល​ ១០​ឆ្នាំ។ ​មូល​ហេតុ​នេះ ​ធ្វើ​ឲ្យ​ ហុងបូ ​ត្រូវ​មើល​ថែ​ខ្លួន​ឯង​ទាំង​ត្រដាបត្រដួស។

ឯ​មិត្ត​ស្រី​ នាង យ៉ាង​ណាន បាន​ទទួល​ដំណឹង​នេះ​តាម​រយៈ​ព័ត៌មាន​ចុះផ្សាយ ​នាង​ក៏​បាន​ព្យាយាម​ទាក់ទង ហុងបូ តាម​អ៊ីនធឺណិត ​រហូត​នាង​សម្រេច​ចាក​ចេញ​ពី​ផ្ទះ​សម្បែង​ទៅ​រស់​នៅ​ជាមួយ ​ហុងបូ ​ដើម្បី​បាន​មើល​ថែ​គាត់​ឲ្យ​មាន​សុខភាព​ល្អ​​ឡើង​វិញ។ ​ការ​សម្រេច​ចិត្ត​ដ៏​លំបាក​​នេះ បាន​ធ្វើ​ឲ្យ​ឪពុក​ម្ដាយ​របស់​នាង​ខឹង​សម្បារ ​តែ​នាង​ប្រាប់​ថា នឹង​ត្រលប់​មក​វិញ​ពេល ហុងបូ ជា​សះស្បើយ​រឹងប៉ឹង​ប្រសើរ​ជាង​មុន។

​ដោយ​សារ​តែ​ចង់​ជម្នះ​ពាក្យ​របស់​អនាគត​ឪពុក​ម្ដាយ​ក្មេក​ថា ពិការ​ហើយ​ធ្វើ​ការ​មិន​កើត ​មិន​អាច​រក​ប្រាក់​​ចិញ្ចឹម​គ្រួសារ​រស់ ហុង​បូ ​សម្រេច​​ចិត្ត​ពិភាក្សា​ជាមួយ​មិត្ត​ស្រី​ជា​ច្រើន​ថ្ងៃ​រិះរក​ចាប់​យក​មុខ​របរ​ណា​ដែល​អ្នក​ពិការ​អាច​ធ្វើ​បាន​ដោយ​មិន​ប្រើ​កម្លាំង​ច្រើន ឬ​ត្រូវ​ការ​ជើង​ទាំង​ពីរ។ ដំបូង យ៉ាងណាន ​ចង់​ឲ្យ​ ហុងបូ ​ធ្វើ​ជា​អ្នក​បើក​បរ​កង់​បី​ដឹក​ជញ្ជូន​ឥវ៉ាន់​ឲ្យ​គេ ​តែ​មិន​មាន​ប្រាក់​ទិញ​សម្ភារៈ​ទាំង​នោះ ម្យ៉ាង​ទៀត​ខ្លាច​ហុងបូ ​នឿយហត់​មិន​អាច​ទ្រាំ​បាន​ដោយ​សារ​ទើប​ក្រោក​ពី​ឈឺ​ថ្មី​ៗ គ៏​បោះ​បង់​គំនិត​នេះ​​វិញ​។

ពួក​គេ​​នឹក​ឃើញ​អាជីព​មួយ​ទៀត​ និង​អាច​​រក​ចំណូល​បាន​​គួរ​សម​ គឺ​​រៀន​ជួស​ជុល​គ្រឿង​អេឡិចត្រូនិក ​ដោយ​ចាប់​ផ្ដើម​ពី​តិច​ៗ​ទៅ។ ​អ្នក​ទាំង​ពីរ​បាន​ប្រមូល​របស់​របរ​មាន​តម្លៃ​ក្នុងផ្ទះ​លក់​ ដើម្បី​យក​ប្រាក់​រៀន​ជំនាញ​នេះ​ឲ្យ​ចេះ​ស្ទាត់​ និង​​សល់​ខ្លះ ​ត្រៀម​ទិញ​សម្ភារៈ​ជួស​ជុល​។ ​ការ​ប្ដេជ្ញា​មិន​ចុះញ៉ម​របស់ ហុងបូ ​ពិត​ជា​មិន​ធ្វើ​ឲ្យ​មិត្ត​ស្រី​ខក​បំណង​ឡើយ ​ដោយ​គាត់​បាន​រៀន​ចេះ​ក្នុង​រយៈ​ពេល​តែ​ប៉ុន្មាន​ខែ ​និង​បាន​បើក​តូប​ជួស​ជុល​មួយ​នៅ​ទី​ប្រជុំជន។

បន្ទាប់​ពី​ដំណើរ​ការ​​របរ​នេះ ​ពួក​គេ​ចាប់​ផ្ដើម​​សន្សំ​​ប្រាក់​បាន​ច្រើន​ រហូត​ផ្ញើរ​មួយ​ចំនួន​ឲ្យ​ទៅ​​ឪពុក​ម្ដាយ​ខាង​ប្រពន្ធ​ទៀង​ផង។ ​ការ​ផ្ញើរ​លើក​ទី​មួយ ពួក​គាត់​​មិន​ទទួល​ទេ ​ព្រោះ​តែ​​ពួក​គាត់​នៅ​មាន​ចិត្ត​ខឹង ​មិន​ទាន់​ស្ងប់ ​ប៉ុន្តែ​ពេល​ឪពុក​ធ្លាក់​ខ្លួន​ឈឺ ​ជីវភាព​ពួក​គាត់​ចេះ​តែ​ដុនដាប ​គ្មាន​ប្រាក់​ថ្លៃ​ព្យាបាល។ ​កូន​ស្រី និង​កូន​ប្រសារ​​ប្រុស​មិន​ល្អ​រូប​នេះ បាន​​​​​​ទៅ​មើល​ថែ​គាត់ និង​ជូន​​ប្រាក់​​​គាត់​ជា​លើក​ទី​ពីរ​។

ម្ដង​នេះ​ទោះ​មិន​ចង់ ក៏​ត្រូវ​ទទួល​​ដែរ​ ដោយ​សារ​ថ្លៃ​ព្យាបាល​របស់​ពេទ្យ​ក៏​ច្រើន​ និង​ចាំ​បាច់​ចាយ​វាយ​ប្រចាំ​ថ្ងៃ​​ក៏​ច្រើន​​។ ​ពេល​នេះ ​ទើប​ពួក​គាត់​ដឹង​ថា ​កូន​ស្រី​ និង​កូន​ប្រសារ​ពិការ​នេះ​ ​កតញ្ញូ ចិត្ត​បាន នៅ​តែ​​បារម្ភ និង​អាច​ជួយ​សម្រាល​បន្ទុក​គាត់​បាន​មួយ​កម្រិត។ បន្ទាប់​ពី​ជា​សះស្បើយ​ពី​ជំងឺ ​ឪពុក​ម្ដាយ​​ដដែល​ ​បាន​យល់​ព្រម​​ទទួល​ស្គាល់​កូន​ប្រសារ ​និង​កូន​ស្រី​វិញ រួច​រៀប​ការ​ឲ្យ​ពួក​គេ​តែម្ដង៕

Leave a Reply

Your email address will not be published. Required fields are marked *