បោះបង់ការងារធ្លាប់ធ្វើជាង១០ឆ្នាំ​ ងាកមកលក់នំត្នោត អាចរកចំណូលបានខ្ទង់ពាន់$ ក្នុង១ខែ!

លោក អ៊ឹង វិទ្ធី គឺជាសហគ្រិនមួយរូប ដែលសុខចិត្តលះបង់ចោលការងារនៅអង្គារ NGO ដែលខ្លួនធ្លាប់បានធ្វើអស់រយៈពេលជាង១០ឆ្នាំ ហើយងាកមកចាប់យករបរធ្វើនំត្នោតខ្មែ នំ​ពង​ទា​ស្នូល​ពង​ទាប្រៃ និង​នំ​ក្រេប​រផ្សេងៗជាច្រើនទៀត ដោយលោកលក់នៅឯងផ្ទះរបស់លោក នៅ​ម្តុំ​ផ្សារ​ឈូក​មាស រាជធានី​ភ្នំពេញ។

លោក​ អ៊ឹង វុទ្ធី បាននិយាយថា ការប្រកប​អាជីវកម្ម​ដោយ​ខ្លួនឯង ធ្វើ​ឲ្យ​លោក​មាន​សេរីភាព​ជាង​ធ្វើការឱ្យអ្នកដទៃ ហើយលោកក៏អាច​បន្សល់ទុក​មុខរប​រ​នេះ​ដល់​កូនចៅ​ជំនាន់​ក្រោយ​របស់លោកផងដែរ។ លោកបាន បន្ថែមទៀតថា មែនទែនទៅកាលពីពេលដែលលោកធ្វើការអង្គការ គឺ​មាន​ភាពងាយស្រួល​ម្យ៉ាងដែរ ប៉ុន្តែ​នៅពេល​យើង​គិតពី​លទ្ធផលចុងក្រោយ​​ ប្រសិនបើយើងនៅតែធ្វើការឱ្យគេ យើងប្រាកដជាមិនបានបន្សល់អ្វីឱ្យកូនចៅជំនាក់ក្រោយនោះទេដោយយើង​បានតែ​ខ្លួនឯង និង​ប្រាក់ចំណូល​។ ហេតុដូច្នេះហើយទើបលោកសម្រេចចិត្តឈប់ពីការងារ ហើយងាកមក​ចាប់ផ្ដើម​អាជីវកម្ម​ខ្លួនឯងវិញ។

ក្រោយពីឈប់ធ្វើការឱ្យគេ លោក អ៊ឹង វុទ្ធី បានសម្រេចិត្តចាប់យកអាជីវកម្មធ្វើនំត្នោតលក់ ហើយមូលហេតុដែលលោកចាប់យករបរធ្វើលក់នំត្នោតនេះ គឺដោយសារតែ កាល​លោក​នៅ​ជា​បុគ្គលិក​អង្គការ លោក​ធ្លាប់​ទិញ​នំត្នោត​ដែល​អ្នកភូមិ​ធ្វើ ហើយ​​នំ​នោះ​មាន​រសជាតិ​ឆ្ងាញ់​។ ដូច្នេះលោក​ក៏មាន​គំនិត​យក​ថា នំត្នោត​ មក​ចាប់ផ្ដើម​អាជីវកម្ម​តែម្តងទៅ។

លើសពីនេះទៅទៀត កត្តាសំខាន់ៗដែលជម្រុញឱ្យលោក សម្រេចចិត្តធ្វើនំត្នោតលក់ គឺដោយសារតែមិនពិបាកក្នុងការរកវត្ថុធាតុដើម ចំណាយកម្លាំងពលកម្មតិច ដោយចំណាយពេលតិចនិងកម្លាំពលកម្មតិច ហើយលោកអាចចាប់ផ្ដើមធ្វើវាតែម្នាក់ឯងបាន។ បន្ថែមពីនេះទៀត មូលហេតុដែលធ្វើឱ្យលោកសម្រេចចិត្តលក់ធ្វើនំត្នោតលក់នៅផ្ទះដោយសារតែលោកមើលឃើញថា ទីផ្សារនៅទទូលាយនៅឡើយ ហើយនៅជុំវិញភូមិស្រុកដែលលោករស់នៅមិនមាននរណា ​ធ្វើនំត្នោតលក់នោះទេ។

ទន្ទឹននឹងនេះ នៅពេលចាប់ផ្ដើមអាជីវកម្មដំបូង លោកជួបបញ្ហានិងឧបសគ្គជាច្រើន ដោយសារតែលោកធ្លាប់តែមានជំនាញកសិកម្មនិងធ្វើការនៅអង្គការ ដូច្នេះហើយនៅពេលដែលលោកបានចំណាយពេលជាង ៥ខែទម្រាំតែលោកអាចរកឃើញរូបមន្ដនិងអាចដុតនំត្នោតបានជោគជ័យ។

ក្រោយ​ការតស៊ូ​អត់ធ្មត់ និង​ព្យាយាម​អស់​រយៈពេល​ខ្ទង់ ៥​ខែ​មកនេះ លោក អ៊ឹង វុទ្ធី ក៏​អាចធ្វើ​នំ​ដែលមាន​រសជាតិ​ឆ្ងាញ់ អាច​ទទួលយកបាន សម្រាប់​ដាក់លក់​នៅផ្ទះរ​បស់​ខ្លួន​ផង និង​ចែកចាយ​ទៅ​ហាង​មួយចំនួន​ក្នុង​រាជធានី​ភ្នំពេញ​ផង​។ លោក វិ​ទ្ធី អះអាងថា លោក​អាច​រកប្រាក់​ចំណូល​បាន​ជាង៣០ដុល្លារ ក្នុង​មួយថ្ងៃ និងជាងជិតមួយពាន់ដុល្លារក្នុង១ខែ ពី​របរ​ធ្វើ​នំ​លក់​នេះ ហើយ លោក ក៏​កំពុង​សិក្សា​ពី​របៀប​ធ្វើ​នំ​ផ្សេងៗ​ទៀត ដើម្បី​ធ្វើ​លក់​បន្ថែម​ផងដែរ​៕

គួរបញ្ជាក់ផងដែរថា ប្រសិនបើលោកអ្នកចង់ញ៉ាំនំត្នោតខ្មែររបស់លោក អ៊ឹង វុទ្ធី លោកអ្នកអាចទំនាក់ទំនងទៅកាន់លេខ 077686361/ 0965563558 ឬអាចទំនាក់ទំនងទៅកាន់ FB: នំ ត្នោតខ្មែរ៕

អត្ថបទដោយ៖ Nava Siri
ប្រភពពី business cambodia

Leave a Reply

Your email address will not be published. Required fields are marked *