មានសង្ឃឹមហើយ!! ក្រុមហ៊ុនធំៗបានកំពុងសម្លឹងរកផ្ទៃដីទំហំ ៣ម៉ឺន ហិកតា វិនិយោគលើដំណាំកប្បាស…

កំពង់ស្ពឺ​ ​៖​ ​ក្រុមហ៊ុន​ជំនាញ​របស់​ចិន​ដ៏​ធំ​មួយ​បាន​បង្ហាញ​ពី​គោលបំណង​របស់​ខ្លួន​ក្នុង​ការ​ចូល​មក​បណ្តាក់​ទុន​វិនិយោគ​ជាច្រើន​លាន​ដុល្លារ​ទៅលើ​ការបង្កើត​តំបន់​ដាំដំណាំ​កប្បាស​នៅ​លើ​ផ្ទៃដី​ជាង​ ​៣ម៉ឺន​ហិ​ក​តា​ ​ស្ថិតនៅ​ក្នុងទឹក​ដី​ខេត្ត​កំពង់ស្ពឺ​ ​ខណៈ​ដែល​គម្រោង​មួយ​នេះ​ត្រូវ​បាន​ពិភាក្សា​ជា​ជំហាន​ដំបូង​ជាមួយ​រដ្ឋបាល​ខេត្ត​រួចរាល់​។​ ​

​បន្ទាប់ពី​បាន​ធ្វើការ​សិក្សា​ពី​ភាពល្អ​ប្រសើរ​នៃ​កត្តា​ភូមិសាស្ត្រ​ ​និង​ភាព​អំណោយផល​នៃ​អាកាសធាតុ​ ​ក្រុមហ៊ុន​ជំនាញ​វិនិយោគ​ដាំដំណាំ​កប្បាស​ដ៏​ធំ​របស់​ប្រទេស​ចិន​បាន​បង្ហាញ​ពី​គោលបំណង​នៃ​ការ​បណ្តាក់​ទុន​វិនិយោគ​ជាមួយនឹង​ទំហំ​ទឹក​ប្រាប់​រាប់​សិប​លាន​ដុល្លារ​ ​នៅ​លើ​ផ្ទៃដី​ជាង៣ម៉ឺន​ហិ​ក​តា​ ​ស្ថិតនៅ​ក្នុង​ខេត្ត​កំពង់ស្ពឺ​។​ ​

​អភិបាលខេត្ត​កំពង់ស្ពឺ​ ​លោក​ ​វ៉ី​ ​សំណាង​ ​បាន​មានប្រសាសន៍​ប្រាប់​តាម​ទូរស័ព្ទ​កាលពី​ព្រឹក​ថ្ងៃទី១៧​ ​ខែមករា​ ​ឆ្នាំ២០២០​ ​នេះ​ថា​ ​ក្រុម​ចិន​ដែល​មានបំណង​មក​បណ្តាក់​ទុន​វិនិយោគ​លើ​ការ​ដាំដំណាំ​កប្បាស​មួយ​នេះ​ ​គេ​បាន​ស្វែងយល់​ពី​ភាពល្អ​ប្រសើរ​ដែល​ទទួល​បាន​ពី​ការ​វិនិយោគ​នៅ​កម្ពុជា​រួចជាស្រេច​។​ ​លោក​បាន​បន្ត​ថា​ ​“​នៅក្នុង​គម្រោង​នៃ​ការ​វិនិយោគ​របស់​ក្រុមហ៊ុន​ចិន​មួយ​នេះ​ ​អាច​មាន​ក្រុម​ហ៊ុន​តូច​ៗ​ជាច្រើន​ទៀត​ដែល​ស្ថិតនៅ​ប្រទេស​ចិន​ចូលរួម​សហ​វិនិយោគ​”​។​ ​

​លោក​បាន​មានប្រសាសន៍​បន្ត​ទៀត​ថា​ ​“​ក្រុមហ៊ុន​ខាងលើ​នេះ​ពិតជា​មានបំណង​មក​បណ្តាក់​ទុន​វិនិយោគ​ ​ដោយ​ត្រូវការ​ផ្ទៃដី​រហូតដល់​ជាង៣ម៉ឺន​ហិ​ក​តា​ ​ដែល​វា​ ​ជា​គម្រោង​វិនិយោគ​ផ្នែក​កសិ​ឧស្សាហកម្ម​ដ៏​ធំ​មួយ​។​ ​បច្ចុប្បន្ន​នេះ​ ​យើង​មិន​មានផ្ទៃ​ដី​ទំនេរ​ច្រើន​នោះ​ទេ​ ​ក្រៅតែ​ពី​ដី​បង្កបង្កើនផល​ស្រូវ​ទំហំ​ប្រមាណ១១ម៉ឺន​ហិ​ក​តា​ ​ដែល​ភាគច្រើន​ជា​កម្មសិទ្ធិ​របស់​វិស័យ​ឯកជន​ ​និង​ប្រជាពលរដ្ឋ​ ​ដូច្នេះ​ ​សម្រាប់​គម្រោង​វិនិយោគ​ដាំ​កប្បាស​របស់​ក្រុមហ៊ុន​ចិន​មួយ​នេះ​ ​អាច​ធ្វើការ​សម្របសម្រួល​ ​ឬ​ទិញ​ដោយ​ផ្ទាល់​រវាង​ក្រុមហ៊ុន​វិនិយោគ​ ​និង​ម្ចាស់ដី​កម្មសិទ្ធិ​ ​ហើយ​រដ្ឋបាល​ខេត្ត​នឹង​ព្យាយាម​ជួយ​សម្របសម្រួល​លើ​ការរៀបចំ​ឯកសារ​ ​ផ្លូវច្បាប់​ជូន​”​។​ ​


​បច្ចុប្បន្ន​នេះ​ ​នៅក្នុង​ខេត្ត​កំពង់ស្ពឺ​ ​សម្រាប់​ផ្ទៃដី​វិនិយោគ​លើ​ផ្នែក​កសិ​ឧស្សាហកម្ម​ ​រួមមាន​ដី​សម្រាប់​ដំណាំ​អំពៅ​មាន​ទំហំ​ ​៤,៥ម៉ឺន​ហិ​ក​តា​ ​និង​ផ្ទៃដី​សម្រាប់​ដំណាំ​ស្វាយ​មាន​ទំហំ​ ​៤,៥​ ​ម៉ឺន​ហិ​ក​តា​ដូចគ្នា​ ​ដែល​ដំណាំ​ទាំង២ប្រភេទ​នេះ​ ​ត្រូវ​បាន​កែច្នៃ​ដើម្បី​នាំចេញ​ទៅកាន់​ទីផ្សារ​ក្រៅ​ស្រុក​ ​៕​
ប្រភព៖ propertyarea

Leave a Reply

Your email address will not be published. Required fields are marked *