ស៊ែរឲ្យនាយកសាលាផ្សេងឃើញផង!! លោកនាយកសាលាវត្តបូព៌ សួរទៅលោកអភិបាលស្រុកបន្ទាយស្រី៖​ ថវិការដ្ឋប្រហាក់ប្រហែលគ្នា ហេតុអីបានសាលាដទៃទៀតធ្វើមិនបានដូចសាលារបស់ខ្ញុំ?

ខេត្តសៀមរាប៖​ សាលាបឋមសិក្សាវត្តបូព៌ ត្រូវបានគេទទួលស្គាល់ជាសាលាគំរូនៃព្រះរាជាណាចក្រកម្ពុជា សាលានេះដែលមានទីតាំងស្ថិតក្នុងភូមិវត្តបូព៌ សង្កាត់សាលាកម្រើក ក្រុងសៀមរាប ខេត្តសៀមរាប ទោះបីជាសាលាដែលមានកេរ្តិ៍ឈ្មោះ​សាយ​ភាយ​ភាព​ល្បី​ពេញ​ទូទាំង​ប្រទេស និង​ហៀរ​ដល់​ក្រៅ​ប្រទេស​ពី​គំរូ​សាលា​បឋម​សិក្សា​មាន​វិន័យ​ល្អ សណ្តាប់​ធ្នាប់​សិស្ស​ល្អ គ្រូ​ល្អ និង​នាយក​ដឹកនាំ​ល្អ​ទៅ​ហើយ​ក្តី ក៏​មិន​ទាន់​បាន​បញ្ឈប់​នូវ​ក្តី​ប្រាថ្នា​របស់​លោក​នាយក​សាលា​រូប​នេះ​នៅ​ឡើយ​ទេ ក្នុង​ការ​ខិតខំ​រិះរក​យុទ្ធសាស្ត្រ ឬ​គោល​ដៅ ដើម្បី​កសាង​កិត្តិសព្ទ​បន្ត​ទៅ​អនាគត​កាន់​តែ​ប្រសើរ​មុន​លោក​ចូល​និវត្តន៍។

ជាក់ស្ដែងយោងតាមផេកហ្វេសប៊ុកលោកឃឹម ហ្វីណង់ ដែលលោកជាអភិបាលស្រុកបន្ទាយស្រី លោកបានបង្ហោះមួយចំនួនដែលជាសកម្មភាពរបស់សិស្សរៀននៅសាលាបឋមសិក្សាវត្តបូព៌ ដោយបានសរសេររៀបរាប់ថា “អច្ឆរិយភាពនៃសាលាបឋមសិក្សាវត្តបូព៌ សាលាគំរូនៃព្រះរាជាណាចក្រកម្ពុជា!​ ធ្លាប់តែឮកិត្តសព្ទរបស់សាលាបឋមសិក្សាវត្តបូព៌យូរហើយ ទើបតែពេលនេះបានមកឃើញផ្ទាល់ភ្នែក និងរៀនសូត្រពីកន្លែងដែលជោគជ័យគួរអោយស្ងើចសរសើរមួយនេះ។

មុនពេលណាត់ជួប លោកគ្រូ ពឹង គិមឆេន បានប្រាប់ខ្ញុំថា បើចង់នាំភ្ញៀវមកមើលសាលាលោកគ្រូ សុំអោយមកពីព្រលឹមម៉ោង៦:៤០នាទីព្រឹក ដើម្បីបានឃើញពីវិន័យសិស្សផង។ មិននឹកស្មានថា បានទទួលការធ្វើបដិសណ្ឋារកិច្ចដ៏គួរអោយភ្ញាក់ផ្អើលបែបនេះសោះ។ តែអ្វីដែលគួរអោយភ្ញាក់ផ្អើលជាងនេះទៅទៀតនោះ គឺភាពអស្ចារ្យនៃវិន័យដ៏ឥតខ្ជោះរបស់សិស្សទាំងនោះ(តាំងពីថ្នាក់មត្តេយ្យតូចៗរហូតដល់ថ្នាក់ទី៦) និងភាពជាអ្នកដឹកនាំប្រកបដោយភាពឆ្នៃប្រឌិតនិងម៉ត់ចត់ខ្ពស់បំផុតរបស់លោកគ្រូនាយក ស័ក្តិសមជាសាលាគំរូប្រចាំប្រទេសកម្ពុជា។

លោកគ្រូបានសួរខ្ញុំថា ថវិការដ្ឋរបស់សាលានេះមានទំហំប្រហាក់ប្រហែលគ្នានឹងសាលាដទៃទៀតដែរ ចុះហេតុអ្វីបានជាសាលានេះធ្វើបាន ហើយសាលាផ្សេងទៀតធ្វើមិនបាន? ខ្ញុំគិតថា ចម្លើយគឺស្ថិតនៅលើភាពឆ្នៃប្រឌិត សមត្ថភាពគៀងគរធនធានបន្ថែមពីខាងក្រៅ និងការជំរុញអោយមានការចូលរួម ដើម្បីសម្រេចចក្ខុវិស័យរបស់លោកនាយក។

ខ្ញុំពិតជាអរគុណលោកគ្រូចំពោះសំនួរនេះ ព្រោះវាជាសំនួរដែលបានបើកចំហការគិតរបស់ខ្ញុំ ផ្លាស់ប្តូរឥរិយាបទនិងការយល់ឃើញទៅលើទំហំមានកំណត់នៃថវិកាអភិវឌ្ឍន៍របស់ស្រុក និងរំលឹកពីតួនាទីរបស់ខ្ញុំជាអ្នកដឹកនាំស្ថាប័នមួយរូប ដែលទាមទារអោយមានភាពឆ្នៃប្រឌិត និងចេះគៀងគរការចូលរួម ដោយមិនពឹងផ្អែកតែទៅលើថវិកាដែលមាននៅក្នុងដៃ តែមួយមុខនោះទេ​ ៕


ប្រភព៖ kbn

Leave a Reply

Your email address will not be published. Required fields are marked *