គាំទ្រគាត់ផង!! កសិករ​ម្នាក់​ក្នុង​ខេត្តស្ទឹងត្រែង​ ទទួលបាន​ជោគជ័យ​លើ​ដំណាំ​ពោត​បារាំង​….

កសិករ​ម្នាក់ នៅ​ខេត្តស្ទឹងត្រែង បានសម្រេច​ចិត្ត​ដាំ​ដំណាំ​ពោត​បារាំង​សាកល្បង រហូត​ទទួលបាន ​ជោគជ័យ ដែល​ការដាំ​នេះ ​គឺ​គាត់​ហាត់រៀន​តាមរយៈ​ការបង្ហាញ​នៅតាម​បណ្ដាញ​សង្គម​ហ្វេ​ស​ប៊ុ​ក​។


លោក តុ អិន​ប៉ កសិករ​នៅ​ភូមិ​ហាង​ខូ​បាន​ សង្កាត់​សាមគ្គី ក្រុង​-​ខេត្តស្ទឹងត្រែង បាន​ប្រាប់​BTV​ថា សព្វថ្ងៃ លោក​ប្រក​បរបរ​ដាំ​ដុះ​បន្លែ​ជីគ្រប់មុខ ​ដើម្បី​ទ្រទ្រង់​ជីវភាព​គ្រួសារ ​ហើយ​មួយរយៈ​ចុង​ក្រោយ​នេះ លោក​បាន​ដាំពោត​បារាំង​បន្ថែម​មួយ​មុខ​ទៀត​ បន្ទាប់ពី​បានឃើញ ​របៀប​ដាំ​ដុះ​ដំណាំ​ប្រភេទ​នេះ ​តាម បណ្ដាញ​សង្គម Facebook ធ្វើ​ឲ្យ​លោក​ចាប់អារម្មណ៍ ​ហើយក៏​បានចាប់ផ្តើម​សាកល្បង​ដាំ ​រហូត​ទទួល ​បាន​លទ្ធផល​ល្អជា​បន្តបន្ទាប់​។


លោក ប៉ បាន​បន្ត​ឲ្យ​ដឹង​ទៀតថា​ នៅ​ថ្ងៃ​ខាងមុខ ​លោក​នឹង​បង្កើន​ការដាំ​ពោត​បារាំង​បន្ថែមទៀត ព្រោះ​បន្លែ​ជីគ្រប់មុខ ​ដែល​លោក​បាន​ដាំ​អស់​រយៈពេល​ជិត​១០​ឆ្នាំ​មកហើយ​នោះ ​ឥឡូវ​អ្នកភូមិ​នាំគ្នា សម្រុក​ដាំ​ច្រើន​ បណ្តាល​ឲ្យ​តម្លៃ​មានការ​ធ្លាក់ចុះ​។ ​ប៉ុន្តែ​ពោត​បារាំង​វិញ ​ស្រួល​ដាំ ​និង​ងាយស្រួល​ថែរក្សា ​ចំណែក​តម្លៃ​ក៏បាន​សមរម្យ ​ដោយ​នៅលើ​ទីផ្សារ អាច​លក់បាន​តម្លៃ​ចន្លោះ​ពី​៧​ពាន់ ទៅ​៨​ពាន់​រៀល ក្នុង មួយ​គីឡូក្រាម នៅ​រដូវប្រាំង ​រីឯ​នៅ​រដូវវស្សា​នេះ​វិញ​ អាច​លក់​បានតែ​៣​ពាន់​រៀល​ប៉ុណ្ណោះ​។


ដោយឡែក​សម្រាប់​បច្ចេកទេស​ដាំ​ដុះ​ និង​វិធី​ដោះស្រាយ​បញ្ហា​ប្រឈម​ចំពោះ​ដំណាំ​ពោត​បារាំង វិញ កសិករ​រូបនេះ បាន​រៀបរាប់ថា ​ដើម្បី​ធ្វើ​ឲ្យ​ដំណាំ​ពោត​បារាំង​ដុះ​លូតលាស់​បានល្អ ​និង​មាន​ទិន្នផល ខ្ពស់ មុន​ដាំ​ត្រូវ​ភ្ជួរ​ដី​ឲ្យ​បាន​ផុស ​និង​សព្វ​ល្អ រួច​បណ្តុះ​កូន​ពោត​បារាំង​ឲ្យ​បាន​ប្រវែង​ជិត​ពីរ​តឹក​សិន សឹម យកទៅដាក់​ដាំ​។ ដំណាំ​នេះ មិនមាន​បញ្ហា​ប្រឈម​ធ្ងន់ធ្ងរ ​ដូច​ដំណាំ​ផ្សេងៗ​ទេ ​ហើយ​បើ​មាន​ក៏មាន​តិច​ តួច​ដែរ​ ដូចជា​សត្វ​ស្រមោច​រោម​តាម​គល់ ​និង​ដើម ​ដែល​បណ្តាល​ឲ្យ​ស្លឹក ​និង​ផ្លែ​ពោត​បារាំង​រួញ​ តែ​បញ្ហា ​នេះ ​អាច​ដោះស្រាយបាន ​ដោយ​ប្រើ​ទឹកសាប៊ូ​បាញ់សម្លាប់​សត្វល្អិត​ទាំងនោះ​។


កសិករ​រូបនេះ បាន​ណែនាំ​ឲ្យ​ប្រជាពលរដ្ឋ ​ក៏ដូចជា​យុវជន ​ពុំទាន់​មានការ​ងារ​ធ្វើ គួរ​ងាក​មក​ធ្វើការ ដាំ​ដុះ​បន្លែបង្ការ ​ជាពិសេស​ដំណាំ​ពោត​បារាំង​នេះ​តែម្តង ​ព្រោះ​វា​ងាយស្រួល​ដាំ ​ហើយ​លោក​នឹង​ជួយ ​បង្ហាត់បង្រៀន​ពី​វិធី​ដាំ​ដុះ ​ដោយ​មិន​យកប្រាក់​កម្រៃ​នោះឡើយ​៕

ប្រភព៖bayontv

Leave a Reply

Your email address will not be published. Required fields are marked *