ដាច់ខាត!!! ​កុំអោយអ្នក​ជក់បារី​នៅជិត​កូនតូច​របស់អ្នក បើនៅតែបន្តនោះ អ្នកប្រាកដជាស្តាយក្រោយមិនខាន

សម្រាប់អ្នកជក់បារី គួរគប្បីជក់​អោយឆ្ងាយពីគេឯង ជាពិសេសក្មេងតូចៗ​តែម្តង ព្រោះថា​អ្នក​ដែល​ស្រូបផ្សែងបារី នឹងទទួល​រង​ផល​ប៉ះពាល់​ខ្លាំង​ជាង​អ្នកជក់ទៅទៀត ។ ជាក់ស្តែងនៅ​ប្រទេសឥណ្ឌូនេស៊ី មានក្មេងប្រុសអាយុ ១ ខែម្នាក់ បានស្លាប់​ដោយសារ​តែ​​ការ​ស្រូបផ្សែង​បារី​នេះឯង ។

យោងតាម​ការ​គណនី​ហ្វេសប៊ុក ស្ត្រីម្នាក់​ដែល​មាន​ឈ្មោះថា Indah ត្រូវជា​ម្តាយ​ក្មេងប្រុររងគ្រោះបាន​សរសេរ​រៀបរាប់​ប្រាប់ថា «មុនពេលរឿងអាក្រក់នេះ បានកើតឡើងមកលើកូនប្រុសរបស់ខ្ញុំ គឺគ្រួសាររបស់ខ្ញុំ បាន​ធ្វើ​ដំណើរ​ទៅ​ផ្ទះម្តាយ​ក្មេកខ្ញុំ ដើម្បីរៀបចំ​កម្មវិធី​បង្កក់កូន ហើយពួកយើងត្រូវ​ស្នាក់​នៅទី​នោះ ១ សប្តាហ៍ ។

ដោយសារ​តែ​កម្មវិធីអ៊ូរអរ ហើយ​ខ្ញុំត្រូវ​ទទួលភ្ញៀវ ទើបមិនអាច​ទុកកូន​អោយគេង​តែម្នាក់​ឯងបាន ដូច្នេះខ្ញុំក៏បាន​បីគេ​មក​កន្លែង​ទទួលភ្ញៀវដែរ ។ ខ្ញុំមិនបានដឹង​ទេថា​តើអ្នក​ណាខ្លះ​បាន​ជក់បារី​នៅទីនោះទេ ។

លុះកម្មវិធី​ចប់សព្វគ្រប់ កូនប្រុស​របស់ខ្ញុំ​មាន​សភាព​ធម្មតា​នោះទេ ។ ស្រាប់តែ ២ ថ្ងៃក្រោយ​មក កូន​ប្រុស​របស់ខ្ញុំ​ក៏ចាប់​ផ្តើមក្អក ហើយ​ដក​ដង្ហើមខ្លីៗ ។ ពេលនោះ​ខ្ញុំ​ក៏បាន​ប្រាប់​ប្តីរបស់ខ្ញុំ ហើយបន្ទាប់មក ខ្ញុំបាន​បញ្ចុក​ថ្នាំក្អក​អោយកូនខ្ញុំ តែម្តងគត់ ដោយសារ​កូន​របស់ខ្ញុំ​នៅតូចពេក ។ តែកូនរបស់​ខ្ញុំ ដូចជា​មិនធូរស្បើយសោះ ហើយ​អាការៈ​របស់គេ​ក៏កាន់តែ​ធ្ងន់ធ្ងរឡើងៗ ។

ខ្ញុំក៏​បាននាំ​គេទៅជួប​គ្រូពេទ្យនៅជិតផ្ទះ ដើម្បីសុំទិញថ្នាំ ប៉ុន្តែ​គ្រូពេទ្យ​បាន​បដិសេធ​មិនលក់​ថ្នាំ​អោយ​នោះទេ ដោយសារ​តែកូន​របស់ខ្ញុំ​នៅតូចពេក ហើយគាត់បាន​ប្រាប់​អោយ​យក​កូន​ទៅមន្ទីរពេទ្យ ធ្វើការពិនិត្យអោយ​បានច្បាស់លាស់ ។ ដូច្នេះខ្ញុំ​ក៏បាននាំ​កូនទៅ​មន្ទីរពេទ្យ​ពិនិត្យសុខភាព លទ្ធផលក្រោយ​ពិនិត្យ​បានអោយ​ដឹងថា កូនប្រុសរបស់ខ្ញុំ​ទទួលរង​នូវជំងឺ​រលាកសួតធ្ងន់ធ្ងរ» ។

ដោយឃើញ​សភាពធ្ងន់​របស់ក្មេង ទើបគ្រូពេទ្យ​បានអោយ​ គេ​គេងនៅ​មន្ទីរពេទ្យ ដើម្បីតាមដានជំងឺ​។ អ្នកស្រី Indah បាន​សរសេរ​បន្ថែមទៀតថា «ព្រះជាម្ចាស់អើយ! ខ្ញុំមាន​អារម្មណ៍​ពិបាកទ្រាំខ្លាំងណាស់ ដែលឃើញ​កូនប្រុសរបស់ខ្ញុំ ចូលក្នុង​បន្ទប់សង្គ្រោះបន្ទាន់ ដោយសារតែការរលាក​សួត​ធ្ងន់ធ្ងរ ។ ប្រសិនជាអាច ខ្ញុំសុំឈឺ​ជំនួស​កូនរបស់​ខ្ញុំវិញ ។ ខ្ញុំសង្ឃឹមថា​គ្រូពេទ្យ​នឹង​ប្រាប់ដំណឹងល្អថា កូនខ្ញុំ​ផុតគ្រោះថ្នាក់ហើយ »។

ផ្ទុយទៅវិញ ស្ថានភាព​របស់ក្មេងតូច​មិនបាន​ប្រសើរ​ឡើងនោះទេ គេត្រូវ​បញ្ជូន​ចូល​ទៅក្នុង​បន្ទប់ ICU ដោយសារតែ​ប្រព័ន្ធ​ការពារ​រាងកាយ​របស់គេចុះ​ខ្សោយ​ខ្លាំងពេក ធ្វើអោយ​ស្ថានភាពរបស់គេកាន់តែ​អាក្រក់ឡើងៗ ។ គ្រូពេទ្យបាន​ហៅអ្នកស្រី Indah ហើយនឹង​ស្វាមី​របស់អ្នកស្រី មកស្តាប់​លទ្ធផល​របស់កូន ។ លទ្ធផល X-ray បានបង្ហាញថា សួត​របស់​ទារក​ខូចស្ទើ​តែ​ទាំងស្រុងទៅហើយ ដូច្នេះ​គ្រូពេទ្យ​ណែនាំ​អោយ​ទទួល​ការវះកាត់ ប៉ុន្តែភាគរយរស់​គឺទាប​បំផុត ។

ជា​អកុសល​​ ដែល​គ្រូពេទ្យ​​មិន​អាច​​សង្គ្រោះ​ជីវិត​ក្មេងប្រុសបាន ដោយសារ​តែសួតរបស់គេខូចខាត​ធ្ងន់ធ្ងរពេក ហើយគេ​ក៏បាន​ស្លាប់​បាត់បង់​ជីវិត​ ក្រោយព្យាបាល​នៅមន្ទីរ​ពេទ្យរយៈពេល ១៣ ថ្ងៃ ។ គ្រូពេទ្យ​បាន​ប្រាប់ថា Hafizh (ក្មេងប្រុស) ស្លាប់ដោយសារ​តែការ​ស្រូប​ផ្សែងបារីច្រើនពេក ដែល​បណ្តាល​​អោយ​សួត​របស់គេ​រងការ​រលាកធ្ងន់ធ្ងរ ៕

Leave a Reply

Your email address will not be published. Required fields are marked *